Komiteti i Arbitrave i Federatës së Futbollit të Maqedonisë kreu analizën e vendimeve kyçe të arbitrimit në ndeshjet e javës së 10-të në Ligën e Parë dhe të javës së 8-të në Ligën e Dytë të Maqedonisë. Vlerësimi i përgjithshëm është se arbitrimi ishte në nivel të shkëlqyer, me zbatim të drejtë të rregullave të lojës së futbollit, kontroll të mirë të ndeshjeve dhe veprim të përshtatshëm gjatë marrjes së vendimeve kyçe të arbitrimit.
Është veçanërisht e rëndësishme që në disa situata u konfirmua saktësia e vendimeve të marra drejtpërdrejt në fushë, ndërsa në të tjera, përmes ndërhyrjeve të sakta dhe në kohë të VAR-it, u korrigjuan vendimet fillestare të arbitrave kryesorë. Ky veprim konfirmon funksionalitetin e sistemit VAR, bashkëpunimin profesional mes ekipeve të arbitrave dhe zbatimin konsistent të protokolleve të vendosura.
Në ndeshjen ndërmjet ekipeve Shkëndija e Haraçinës dhe Struga Trim & Lum, në minutën e 24-t, pas një faulli fillimisht të pavërejtur ndaj sulmuesit të ekipit mysafir, arbitrat e VAR-it ndërhynë saktë dhe propozuan rishikimin e pamjeve në fushë (OFR). Pas rishikimit të kryer, arbitri kryesor e ndryshoi saktë vendimin e tij, duke akorduar penallti dhe duke i treguar karton të kuq të drejtpërdrejtë lojtarit mbrojtës për pengim të një mundësie të dukshme për shënim (DOGSO). Kjo situatë përbën shembull të një ndërhyrjeje të arsyeshme të VAR-it, me respektim të plotë të protokollit dhe zbatim të saktë të kritereve të Rregullave të lojës së futbollit. Edhe kartoni i kuq për lojtarin mbrojtës ishte treguar saktë.
Në ndeshjen ndërmjet Bashkimit dhe Sileksit, në minutën e 81-të, pas kontrollit nga VAR-i, goli i ekipit vendas u anulua saktë për shkak të pozitës jashtë loje të lojtarit me numrin 80 në aksionin që i parapriu golit. Lojtari, nga një pozitë e palejueshme, u përfshi në aksionin nga i cili më vonë u shënua goli. Edhe kjo situatë, aspak e thjeshtë për t'u vlerësuar, konfirmon rëndësinë e teknologjisë në marrjen e vendimeve të sakta përfundimtare të arbitrimit.
Në ndeshjen Arsimi – Tikvesh, në minutën e 23-të, goli i ekipit vendas u anulua saktë për shkak të pozitës jashtë loje.
Në minutën e 74-t, arbitrat në fushë morën vendim të saktë, pasi nuk pati prekje me dorë nga lojtari mbrojtës i ekipit mysafir brenda zonës së tij të rreptësisë.
Në një situatë tjetër të analizuar, në ndeshjen e Ligës së Dytë të Maqedonisë ndërmjet ekipeve të KF Euromilk dhe KF Novaci, arbitri kryesor e dalloi saktë përpjekjen për simulim në zonën e rreptësisë. Sulmuesi e inicioi vetë kontaktin me lojtarin kundërshtar me qëllim që të fitonte një faull, pa pasur ndonjë veprim të palejueshëm nga lojtari mbrojtës. Veçanërisht pozitive ishin pozicionimi i shkëlqyer i arbitrit, afërsia e tij me vendin e ngjarjes dhe këndi i përshtatshëm i vëzhgimit, të cilat i mundësuan ta vlerësonte saktë situatën dhe të merrte vendim të drejtë. Kjo konfirmon se arbitrimi cilësor nuk varet ekskluzivisht nga teknologjia, por mbi të gjitha nga njohuritë, përqendrimi dhe pozicionimi i duhur i arbitrave.
Situatat e përmendura tregojnë se integriteti dhe konsistenca në arbitrim nuk nënkuptojnë që çdo vendim fillestar të mbetet i pandryshuar, por që çdo vendim përfundimtar të jetë i saktë, i argumentuar dhe i marrë në përputhje me Rregullat e lojës së futbollit. Gatishmëria për ta korrigjuar një vendim kur ekzistojnë baza të qarta për ndërhyrje të VAR-it përbën përgjegjësi profesionale, e jo dobësi të ekipit të arbitrave.
Në të njëjtën kohë, Komiteti i Arbitrave thekson rëndësinë e objektivitetit dhe përgjegjësisë gjatë analizimit të situatave të diskutueshme. Analizat duhet të bazohen ekskluzivisht në kriteret për zbatimin e Rregullave të lojës së futbollit dhe të protokollit të VAR-it, duke marrë parasysh edhe kontekstin e plotë të lojës, përkatësisht aksionin në tërësi, dhe jo fotografi të paraqitura në mënyrë selektive ose të ndryshuara në mënyrë digjitale, të cilat mund të krijojnë një paraqitje të gabuar të ngjarjeve në fushë.
Në këtë drejtim, Komiteti i Arbitrave konsideron se qasja konstruktive ndaj situatave të diskutueshme nënkupton edhe njohjen e vazhdueshme me Rregullat e lojës së futbollit dhe protokollin e VAR-it, si dhe gatishmërinë për konsultim profesional dhe sqarim shtesë sa herë që ekzistojnë dilema lidhur me vendime të caktuara të arbitrimit.
Komiteti i Arbitrave do të vazhdojë me analizën e vazhdueshme profesionale, edukimin dhe vlerësimin e paraqitjeve të arbitrave, me theks të veçantë në harmonizimin e kritereve të arbitrimit, zbatimin e saktë të protokollit të VAR-it dhe përmirësimin e mëtejshëm të cilësisë së arbitrimit.
