Македонија не успеа да извлече позитивен резултат од гостувањето во Глазгов, откако загуби од Шкотска со 2-1 на „Хемпден парк“, во петтиот натпревар од Лигата на нации. Џон Мекгин со два гола ја предводеше домашната селекција до победата, додека Елмин Растодер го постигна единствениот погодок за Македонија и стави крај на серијата без гол на националниот тим.
Но, останува впечатокот дека Шкотска доби пенал по реакција од ВАР собата.
Шкотска уште во првото полувреме ја презеде иницијативата и создаде неколку изгледни шанси, но Столе Димитриевски беше најсигурниот дел од македонската селекција. Голманот на Македонија во повеќе наврати одлично интервенираше, запирајќи ги обидите на Скот Мектоминеј и Че Адамс.
Најдобрата можност за домаќините во првиот дел ја имаше Мектоминеј во 16. минута, но Димитриевски со одлична одбрана го сочува својот гол. Истиот дуел се повтори и во 39. минута, кога македонскиот чувар на мрежата повторно излезе како победник. На спротивната страна, Дориев се обиде да се закани, но без конкретна завршница.
Шкотите продолжија со притисокот и по паузата. Веќе во 46. минута Били Гилмор пропушти неверојатна можност, откако од непосредна близина ја испрати топката над пречката, иако пред себе имаше речиси празен гол.
Сепак, во 54. минута Мекгин ја искористи недоволната комуникација во македонската одбрана. По долгата топка, Муслиу и Елмас не реагираа најдобро, Че Адамс ја продолжи акцијата, а Мекгин излезе очи в очи со Димитриевски и реализираше за 1-0.
Македонија, сепак, покажа карактер и само три минути подоцна го врати резултатот во рамнотежа. Енис Барди изведе корнер од левата страна, а Елмин Растодер се најде на првиот дирек и со прецизен удар со глава го постигна својот прв репрезентативен гол за 1-1. Тоа беше и првиот погодок за Македонија во ова издание од Лигата на нации.
Одлуката за победникот падна во 74. минута. По прегледувањето на ситуацијата и интервенцијата од ВАР-собата, судијата Михал Оченаш досуди пенал за Шкотска по стартот на Столе Димитриевски во македонскиот шеснаесетник. Мекгин беше сигурен од белата точка и го постигна својот втор гол на натпреварот за 2-1.
До крајот Македонија се обиде повторно да се врати во игра. Енис Барди во 85. минута упати опасен удар од слободен удар, но Ган беше на вистинското место и ја зачува предноста на домаќините.
ШКОТСКА – МАКЕДОНИЈА 2-1 (0-0)
Стадион „Хампден парк“ во Глазгов. Гледачи: 45.000. Судија: Михал Оченаш (Словачка). Стрелци: Мекгин 54′, 74′ пен. (Шкотска), Растодер 57′ (Македонија).
ШКОТСКА: Ган, Портеус, Греам, Тирни, Ганон – Доук (76′ Хики), Фергусон, Гилмор (76′ Кристи), Робертсон, Мектоминеј, Адамс (66′ Мекбрни).
Селектор: Себастиен Покоњоли
МАКЕДОНИЈА: Димитриевски, Илиевски, Младеновски, Муслиу, Алиоски, Гаштаров (64′ Елези), Елмас (78′ Л. Станковски), Барди, Дориев (84′ Николов), Растодер (78′ Омерагиќ), Чурлинов (64′ Малески).
Head coach: Goce Sedloski
