Шкендија ја прекина серијата од два меча без триумф во домашното првенство со победа од 3-1 против Струга Трим Лум.
Дуелот започна со висок интензитет, а првото поголемо возбудување се случи во 24. минута. Бојан Илиевски невнимателно реагираше и го собори Ендрит Красниќи во шеснаесетникот, по што судијата покажа на белата точка.
Красниќи ја презеде одговорноста и сигурно реализираше за 1-0.
Радоста на Шкендија не траеше долго. Струга Трим Лум брзо се врати во натпреварот преку Стефан Јевтовски, кој најдобро реагираше по една одбиена топка и израмни на 1-1.
Сепак, домаќините повторно ја презедоа контролата пред паузата. По корнер од десната страна на Красниќи, Ислами остана осамен во срцето на казнениот простор и со прецизен удар по земја го совлада противничкиот голман за 2-1.
Во второто полувреме, погодокот на Нзенгуе беше поништен поради офсајд по пороверка во ВАР-собата.
На спротивната страна, Зенделовски имаше одлична можност за ново израмнување, но Гаје со одлична интервенција ја зачува предноста на Шкендија.
Клучниот момент за триумф на Шкендија се случи во 69. минута, кога Мазари постигна ефектен гол за конечни 3-1, со што ја потврди победата на тетовскиот тим.
