Përfaqësuesja e Maqedonisë deri në 21 vjeç më 12 nëntor në Novi Sad do të zhvillojë një ndeshje miqësore kundër përfaqësueses së Serbisë. Dueli do të zhvillohet në stadiumin „Karagjorgje“ dhe do të përbëjë një sfidë serioze, si dhe një mundësi për të testuar potencialin e gjeneratës së re të futbollistëve maqedonas.
Në prag të ndeshjes, përfaqësuesi i të rinjve Dimitar Danev pret një duel të vështirë kundër një kundërshtari cilësor, por beson se Maqedonia ka kapacitetin për t’iu përgjigjur sfidës dhe për të imponuar veten në fushë.
„Pres një ndeshje të vështirë kundër Serbisë. Bëhet fjalë për një përfaqësuese cilësore, por edhe ne kemi cilësitë tona. Ka ndodhur një ndryshim gjenerate, por tashmë kemi zhvilluar disa grumbullime së bashku dhe mendoj se po përparojmë nga dita në ditë. Besoj se do të ofrojmë rezistencë të fortë dhe do të arrijmë një rezultat pozitiv.
Po përgatitemi shkëlqyeshëm. Serbia është në të njëjtin nivel cilësor me përfaqësueset kundër të cilave luajtëm në ciklin e kaluar. Patëm mundësinë të përballemi me disa përfaqësuese shumë të mira, të cilat kanë cilësi të jashtëzakonshme. Jemi të vetëdijshëm se me çfarë lojtarësh disponojmë dhe kjo do të jetë një test i vërtetë për të parë se ku jemi dhe çfarë mund të tregojë kjo gjeneratë“, thekson Danevi.
Ai mendon se futbollistët janë në formë të mirë konkurruese dhe se përgatitja nuk do të përbëjë problem para udhëtimit në Novi Sad.
„Mendoj se çdo futbollist në përfaqësuese ka minuta të mjaftueshme dhe do të japë maksimumin për të arritur fitoren. Nuk mendoj se do të kemi problem as sa i përket përgatitjes, as sa i përket formës konkurruese.
Sigurisht që ndiejmë përgjegjësi, por pikërisht për këtë jemi këtu. Besoj se mund ta përballojmë presionin dhe të tregojmë se jemi të aftë ta udhëheqim këtë përfaqësuese“, thotë Danevi.
Ndeshja miqësore kundër Serbisë do të jetë një tjetër mundësi e rëndësishme për përbërjen e re të Maqedonisë deri në 21 vjeç për të testuar gatishmërinë e saj kundër një kundërshtari cilësor.
