Никел Ор: Се надеваме дека ќе се вратиме на победнички колосек

По двонеделната пауза поради настапите во Лигата на нации, викендов се враќа елитниот фудбал со натпреварите од 14. коло. Воведниот дуел ќе се одигра меѓу Шкендија од Арачиново и Башкими. Напаѓачот на Башкими, Никел Ор, верува дека екипата од Куманово ќе ја надмине негативната традиција и ќе се врати на победите, со цел да се оддалечи од опасната зона.

„Шкендија од Арачиново засега игра одлично првенство и покажа дека е многу тежок противник за победување, особено на свој терен. Сепак, се надеваме дека ќе се вратиме на победнички колосек и ќе излеземе од опасната зона“, изјави, меѓу другото, напаѓачот на Башкими, Никел Ор.

На досегашните три меѓусебни пресметки меѓу овие два тима, поуспешна е Шкендија од Арачиново, која ги доби сите три дуели. Во Купот на Македонија, Шкендија славеше со 2:1, додека во првенството запиша победа од 2:0 на гостувањето во Куманово. Пред една година, на пријателски натпревар, „црвено-црните“ повторно беа поуспешни со 2:0.

Натпреварот меѓу Шкендија од Арачиново и Башкими ќе се одигра во петок (20.11) на стадионот во Чаир, со почеток во 13:00 часот. Правдата ќе ја дели главниот судија Стојанче Трпчевски.