По големата победа над Шкендија во Тетово, екипата на Башкими со многу оптимизам влегува во претстојниот дуел со „црвено-црните“. Во рамките на 30-тото коло, кумановци ќе се соочат со Вардар, но наместо во Куманово, натпреварот ќе се одигра во Гостивар.
И покрај тоа што Башкими ќе го пречека најтрофејниот македонски клуб на неутрален терен, мотивот кај фудбалерите е на највисоко ниво. Тимот сè уште ја бара „безбедната зона“ за опстанок во елитата, што е дополнителен мотив за успех.
Капитенот на Башкими, Арменд Алими, истакнува дека атмосферата во соблекувалната е одлична и дека целта е јасна – нови три бода.
„Нормално е дека одиме на победа и на овој натпревар. Сè уште не сме математички сигурни на табелата, па затоа овој триумф е од витално значење за нас. Мотивирани сме и верувам дека ќе го дадеме најдоброто од себе за да ги освоиме бодовите и во Гостивар“, изјави Алими.
Низ историјата, овие две екипи се сретнале вкупно 17 пати. Статистиката е на страната на скопскиот тим, кој има 10 победи, додека 3 средби завршиле нерешено. Екипата од Куманово излезе како победник во четири натпревари, последен пат на 13 април 2008 година (2-0).
Натпреварот помеѓу Башкими и Вардар започнува во 16:00 часот на стадионот во Гостивар.
