Struga TL e mposhti minimalisht, me rezultat 1:0, Shkëndijën në derbin e xhiros së 13-të. Golin e vetëm për vendasit e shënoi Maleski në minutën e 79-të, duke bërë që struganët të marrin vendin e parë në tabelën e Ligës së Parë.
„Nuk ishte një ndeshje e barabartë, pasi ne gjatë gjithë kohës kishim iniciativën në fushë, krijuam raste dhe sistemi VAR reagoi tri herë. Mendoj se sot ishim kundërshtar më i mirë se Struga TL. Ata shënuan nga një rast ose gjysmë-rast, ndërsa gjatë gjithë kohës u mbrojtën. Por futbolli është i tillë – nëse nuk shënon, është normale të pësosh. Tani na pret një pushim që do të na ndihmojë shumë, pasi ky ishte takimi ynë i 19-të këtë sezon dhe pushimi do të jetë i mirëpritur. Mendoj se duhet ta shfrytëzojmë për t’u dhënë më shumë pushim disa lojtarëve, sepse kemi zhvilluar shumë ndeshje. Pushimi do të ndikojë pozitivisht tek ne“, theksoi trajneri i Shkëndijës, Artim Polozhani.
Nga ana tjetër, trajneri i Struga TL nuk ishte i kënaqur me pjesën e parë.
„Mendoj se ishte një ndeshje e mirë dhe fituam tri pikë të rëndësishme. Megjithatë, mendoj se në pjesën e parë nuk luajtëm siç duhej dhe nuk e zbatuam atë që kishim ushtruar gjatë gjithë javës. Dua t’i falënderoj lojtarët, të cilët në pjesën e dytë vrapuan më shumë dhe e merituan fitoren. Sa i përket garës për titull, konkurrenca është e madhe – këtu janë Shkëndija, Vardari dhe Tikveshi, të cilat kanë skuadra të shkëlqyera. Ne do të përpiqemi të fitojmë çdo ndeshje dhe, dashtë Zoti, në fund të jemi të parët. Mendoj se kemi një skuadër të mirë“, deklaroi Blendi Shkembi, trajneri i Struga TL.
