Federata e Futbollit të Maqedonisë, në interes të informimit të hapur dhe transparent të publikut lidhur me ankesën e paraqitur nga KF Vardar për aktivizimin e parregullt të një futbollisti të KF Tikvesh në ndeshjen e raundit të 1/8 së finales së Kupës së Maqedonisë, e informon publikun edhe për faktet e mëposhtme.
FFM-ja, në asnjë njoftim të deritanishëm drejtuar publikut ose klubeve, nuk ka deklaruar se KF Tikveshi ka falsifikuar dokumentin mjekësor të futbollistit Okere Ebube Wisdom. Informacioni kishte të bënte me të dhënat e futura në sistemin KOMET, ku në pjesën për kontrollin mjekësor ishte regjistruar një dokument në emër të Miloš Spasovskit, i cili nuk është anëtar i KF Tikveshit që nga 3 shtatori 2026.
Në përputhje me Propozimet e garimit për First MFL, në nenin 20, pika 6 thuhet:
Vërtetimi i kryerjes së kontrollit mjekësor duhet të futet detyrimisht në KOMET para fillimit të kampionatit dhe pas skadimit të vlefshmërisë së tij.
Për më tepër, sot, në orën 14:26, KF Tikveshi ka bërë ndryshim në sistemin KOMET, me ç’rast në pjesën për dokumentin mjekësor është bashkëngjitur vërtetimi sportivo-mjekësor në emër të Okere Ebube Wisdomit, ndërsa administratori i KOMET-it i KF Tikveshit e ka ndryshuar vërtetimin mjekësor në emër të Miloš Spasovskit me statusin – joaktiv, në orën 14:27.
Për më tepër, kjo nuk është hera e parë që konstatohen të dhëna të futura në mënyrë të papërshtatshme në sistemin KOMET nga KF Tikveshi. Përsëritja e situatave të tilla ngre pyetje serioze për saktësinë e të dhënave që klubi fut në sistemin zyrtar dhe për përgjegjësinë e personave të ngarkuar me përditësimin dhe kontrollin e tyre.
FFM-ja thekson se për bazueshmërinë e ankesës do të vendosë Komisioni kompetent i Garave, ekskluzivisht në bazë të rregullave dhe dispozitave në fuqi.
FFM-ja mbetet e përkushtuar ndaj informimit transparent, respektimit të procedurave të përcaktuara dhe zbatimit konsekuent të rregullave, me qasje të barabartë ndaj të gjitha klubeve.
