Raundi i dhjetë në garën e Ligës së Dytë u hap me tre ndeshje, në të cilat dominuan mysafirët.
Ekipi kryesues i tabelës, Ohridi, si mysafir mposhti Shkupin me rezultatin 3:0. Serinë e golave në stadiumin në Çair e hapi David Mateski që në minutën e tretë.
Në minutën e 37-të, Antonio Kalanoski e rriti epërsinë në 2:0, ndërsa rezultatin përfundimtar e vendosi Damian Masevski, i cili shënoi në listën e golashënuesve pesë minuta para përfundimit të ndeshjes.
Fitore si mysafirë shënuan edhe futbollistët e Kozhufit, të cilët triumfuan me rezultatin 3:1 në përballjen ndaj Euromilkut.
Vendasit kaluan në epërsi me golin e Husein Demirit në minutën e parë. Në fund të pjesës së parë, futbollistët nga Gjevgjelia arritën të përmbysin rezultatin.
Në minutën e 42-të, Sasho Dukov barazoi në 1:1, ndërsa dy minuta më vonë Darko Grozdanovski i dha Kozhufit epërsinë 2:1.
Rezultatin përfundimtar e vendosi Dukov me golin që shënoi në minutën e katërt të kohës shtesë të gjykuar në pjesën e dytë.
Nderin e vendasve e shpëtoi AP Brera, e cila në Strumicë mposhti Novacin me rezultatin 4:1. Në një ndeshje në të cilën të pesë golat u shënuan në pjesën e dytë, serinë e hapi Bojan Velkov në minutën e 64-t.
Tetë minuta më vonë, Hristijan Dragarski barazoi në 1:1, ndërsa në minutën e 76-të Vladimir Zhoglev e kaloi AP Brerën në epërsi 2:1.
Golin e tretë për vendasit e shënoi David Ristovski në minutën e 83-të, ndërsa dy minuta më pas Jovan Postolov realizoi golin e katërt për skuadrën nga Strumica.
Raundi i dhjetë i Ligës së Dytë do të kompletohet të dielën, ndërsa në program janë ndeshjet Kamjani – Teteksi, Pelisteri – Detonit Plaçkovica, Macedonia GP – Osogova dhe Rabotniçki – Bellasica.
Fillimi i të gjitha ndeshjeve është caktuar për orën 13:30.
