Humbje nga Sllovenia në Shkup

Përfaqësuesja e futbollit të Maqedonisë pësoi humbjen e gjashtë në Ligën e Kombeve, pasi në shtëpi humbi nga Sllovenia me rezultatin 0-3. Daniel Sturm në minutat 29 dhe 90, si dhe Zec në minutën 67, shënuan golat për kundërshtarin.

Sllovenët morën iniciativën që nga fillimi dhe kërcënimin e parë serioz e krijuan në minutën e 16-të. Daniel Sturm depërtoi në krahun e majtë dhe dërgoi topin në zonë, ndërsa Mladenovski, në përpjekje për të ndërhyrë, goditi shtyllën e portës maqedonase.

Maqedonia u përgjigj përmes Enis Bardhit, i cili në minutën e 24-t provoi nga një goditje e lirë nga distanca e madhe, por Jan Oblak e lexoi qëllimin. Në anën tjetër, Žan Vipotnik kërcënoi me një goditje nga 15 metra, por Stole Dimitrievski parandaloi ndryshimin e rezultatit.

Megjithatë, në minutën e 29-të, mysafirët e shfrytëzuan rastin e tyre. Pas një kundërsulmi të shpejtë, topi arriti te Sturm, i cili e gjeti rrugën drejt rrjetës dhe i dha epërsinë Sllovenisë.

Deri në pushim, Maqedonia nuk arriti të krijonte një mundësi serioze për barazim. Situatën më të mirë e pati në minutën e 33-të, kur Darko Çurlinov i përgatiti një rast Elif Elmasit, por përfaqësuesi ynë nuk arriti të reagonte në kohë.

Sedlloski u përpoq ta ndryshonte pamjen e ndeshjes me tri zëvendësime në pjesën e parë. Në lojë hynë Maleski, Omeragić dhe Doriev, pas së cilës Maqedonia luajti më në mënyrë ofensive.

Pikërisht Doriev ishte ndër më aktivët në minutat e para të pjesës së dytë. Në minutën e 50-të, ai gjuajti nga 16 metra dhe Oblak nuk arriti ta mbante topin, por ai përfundoi në goditje këndi. Dy minuta më vonë, ai kërcënoi sërish, por portieri slloven e ruajti mirë portën e tij. Në minutën e 60-të, rast pati edhe Bardhi, goditja e të cilit nga skaji i zonës nuk e befasoi Oblakun.


Kur Maqedonia po përpiqej të arrinte barazimin, Sllovenia dha një goditje tjetër. Pas një goditjeje këndi nga ana e djathtë në minutën e 67-të, David Zec ishte më i shkathëti në zonë dhe me golin e tij të dytë i zgjidhi dilemat rreth fituesit.

Sturm pati mundësi të shënonte edhe golin e dytë personal në minutën e 74-t, por nuk ishte i saktë. Megjithatë, ai u përmirësua në minutën e 90-të, kur vendosi rezultatin përfundimtar, 0-3 në favor të sllovenëve.

Vendi i fundit në grup do të thotë se Maqedonia në mars do të duhet të luajë në barazh për mbijetesë në Divizionin B të Ligës së Kombeve.

MAQEDONIA – SLLOVENIA 0-3 (0-1)
Arena Kombëtare „Toše Proeski“. Gjyqtar: Serdar Gözübüyük (Holandë). Shënues: Sturm 29′, 90′, Zec 67′ (Slloveni). Kartonë të verdhë: Alioski (Maqedoni), Čerin, Karničnik, Verbič (Slloveni).

MAQEDONIA: Dimitrievski, Ilievski (46′ Doriev), Mladenovski, Musliu, Alioski, Gashtarov, Elezi (46′ Omeragić), Elmas, Bardhi (86′ Atanasov), Čurlinov (46′ Maleski), Rastoder (72′ M. Gjorgjievski).
Përzgjedhës: Goce Sedlloski

SLLOVENIA: Oblak, Drkušić (86′ Obrić), Zec, Zalatel, Janža (46′ Kuzmić), Karničnik, Čerin, Lovrić (62′ Zabukovnik), Sturm, Matko (74′ Verbič), Vipotnik (74′ Šporar).
Përzgjedhës: Boshtjan Cesar