Përfaqësuesja A e Maqedonisë e nisi pjesëmarrjen në edicionin e ri të Ligës së Kombeve me humbje 0-3 ndaj Zvicrës. Skuadra jonë nuk arriti t’i kundërvihej kundërshtarit cilësor, i cili gjatë gjithë ndeshjes kishte kontrollin dhe meritoi të arrinte një triumf bindës.
Zvicra e mori iniciativën që nga fillimi dhe menjëherë e vuri mbrojtjen nën presion. Dan Ndoye ishte ndër të parët që kërcënoi, ndërsa në minutën e nëntë Zeki Amdouni pati një mundësi të shkëlqyer për të kaluar në epërsi. Sulmuesi zviceran hyri në zonë dhe, pavarësisht se rreth tij kishte disa futbollistë maqedonas, arriti të gjuante, por topi përfundoi pranë portës.
Amdouni ishte sërish i rrezikshëm në minutën e 13-të, por edhe këtë herë nuk shënoi. Maqedonia u kundërpërgjigj tre minuta më vonë përmes Matej Gashtarovit, i cili provoi me një goditje nga distanca, por pa saktësi.
Zviceranët e kurorëzuan fillimin e tyre më të mirë në minutën e 22-të. Pas një serie pasimesh dhe presionit pranë portës së Stole Dimitrievskit, topi arriti te Remo Freuler, i cili nga rreth 12 metra e dërgoi saktë në rrjetë për 0-1.
Mysafirët nuk u tërhoqën pas golit të shënuar. Përkundrazi, vazhduan të sulmonin, ndërsa Dimitrievski duhej të ndërhynte pas goditjes së Manzambit. Në minutën e 27-të, Maqedoninë e shpëtoi shtylla; Dan Ndoye gjuajti pas një aksioni të ri, por topi përfundoi në shtyllë pasi ndërhyri edhe Dimitrievski.
Deri në pushim, Dimitrievski e mbajti edhe një herë Maqedoninë në lojë. Në minutën e 39-të, Johan Manzambi gjuajti saktë drejt këndit të sipërm të djathtë, por portieri maqedonas me një pritje të shkëlqyer arriti ta ndalë topin dhe ta devijojë në korne.
Megjithatë, as Dimitrievski nuk mundi ta parandalonte golin e dytë. Në minutën e 42-të, Atekame dërgoi një top të shkëlqyer nga krahu i djathtë, ndërsa Amdouni e realizoi shansin me goditjen e parë, pa vështirësi të mëdha, për 0-2.
Menjëherë pas pushimit pasoi një situatë e diskutueshme. Pas ndërhyrjes së Matej Gashtarovit, gjyqtari Daniel Shlager fillimisht i tregoi karton të kuq direkt. Pas rishikimit dhe ndërhyrjes së VAR-it, arbitri gjerman e ndryshoi vendimin dhe e ndëshkoi reprezentuesin tonë vetëm me karton të verdhë.
Zvicra vazhdoi ta diktonte ritmin edhe në pjesën e dytë. Në minutën e 64-të, Dan Ndoye u gjend i vetëm përballë Dimitrievskit, por portieri ynë reagoi sërish shkëlqyeshëm dhe parandaloi një tjetër gol.
Megjithatë, goli i tretë erdhi në minutën e 74-të. Zeki Amdouni e mposhti Dimitrievskin për herë të dytë gjatë mbrëmjes dhe e rriti epërsinë në 0-3.
Sulmuesi i Zvicrës mund të arrinte edhe het-trikun në minutën e 81-të, por Dimitrievski ishte sërish në lartësinë e detyrës dhe me një ndërhyrje të mirë e parandaloi golin e katërt.
Deri në fund nuk pati ndryshim të rezultatit, ndaj Zvicra me fitoren bindëse 0-3 i mori pikët, ndërsa Maqedonia do të duhet ta kërkojë rezultatin e parë pozitiv në vazhdimin e ciklit, në transfertën në Lubjanë kundër Sllovenisë.
MAQEDONI – ZVICËR 0-3 (0-2)
Arena Kombëtare „Todor Proeski“. Spektatorë: 15.000. Gjyqtar: Daniel Shlager (Gjermani). Shënues: Freuler 22′, Amdouni 42′, 74′ (Zvicër). Kartonë të verdhë: Ilievski, Bardhi, Gashtarov, A. Omeragiq (Maqedoni)
MAQEDONIA: Dimitrievski, Ilievski (75′ Stojçevski), Musliu, Zajkov (56′ Meliqi), Herrera, Gashtarov, Kostadinov (46′ Elezi), Bardhi, Elmas, Miovski (56′ Omeragiç), Rastoder (46′ Mitrovski).
Përzgjedhës: Goce Sedlloski
ZVICRA: Kobel, Atekame, Elvedi, Akanxhi, Rodriguez (63′ Brichgi), Jashari, Freuler, Rieder (76′ Sanchez), Ndoye (76′ Abisher), Manzambi (63′ Sow), Amdouni (86′ Boteli).
Përzgjedhës: Murat Jakin
