Përfaqësuesen e re të Maqedonisë U-21 e presin ndeshjet kundër Malit të Zi dhe Suedisë në kuadër të kualifikimeve për Kampionatin Evropian, ndërsa dueli me malazezët do të jetë edhe debutimi zyrtar për përzgjedhësin e ri, Aleksandar Tanevski-n.
Tanevski pret që skuadra të tregojë karakter dhe disiplinë, por edhe një ide të qartë për mënyrën se si dëshiron të luajë.
„Para së gjithash, kundër Malit të Zi, veçanërisht pasi ky do të jetë ndeshja ime e parë zyrtare si përzgjedhës i përfaqësueses, duam një rezultat pozitiv dhe fitore. Dua të shoh karakter dhe disiplinë, por edhe mënyrën se si duam të luajmë në të ardhmen“, thotë Tanevski.
Përveç ciklit aktual kualifikues, të dyja ndeshjet janë të rëndësishme edhe si pjesë e përgatitjeve për ciklin e ardhshëm. Përzgjedhësi i ri paralajmëron se do t’u japë hapësirë futbollistëve të rinj, të cilët duhet të tregojnë se mund t’u përgjigjen kërkesave të përfaqësueses.
„Këto ndeshje janë pjesë e rëndësishme e përgatitjeve për ciklin e ardhshëm kualifikues. Duam t’u japim hapësirë lojtarëve që kanë potencial dhe të shohim cilët prej tyre mund t’u përgjigjen kërkesave të këtij niveli“, thekson Tanevski.
Një test i mirë për stafin e ri teknik ishte edhe ndeshja miqësore kundër Rusisë U-21, në të cilën Maqedonia u paraqit në mënyrë të shkëlqyer. Pjesën më të madhe të formacionit e përbënin futbollistë të gjeneratave 2006 dhe 2007, por mundësinë e patën edhe gjashtë lojtarë më të rinj: një nga gjenerata 2008, katër nga viti 2009 dhe një nga viti 2010.
„Ndeshja me Rusinë ishte një test i mirë për ne. Në pjesën e parë patëm tri raste të shkëlqyera, luajtëm kompakt dhe me energji të mirë. Edhe pse e humbëm ndeshjen 3:2, morëm përgjigje të rëndësishme dhe pamë se kemi futbollistë tek të cilët mund të llogarisim në të ardhmen“, thotë Tanevski.
Fokusi tani është tërësisht i orientuar te Mali i Zi. Maqedonia dëshiron ta nisë periudhën e re nën drejtimin e Tanevskit me lojë të mirë dhe rezultat pozitiv, por paralelisht të vazhdojë të krijojë një skuadër që do të jetë e gatshme për ciklin e ardhshëm kualifikues.
„Tani fokusi është tërësisht te Mali i Zi. Duam ta nisim këtë periudhë të re me lojë të mirë, karakter dhe rezultat pozitiv, ndërsa paralelisht të vazhdojmë të ndërtojmë një skuadër që do të jetë e gatshme për ciklin e ardhshëm kualifikues.“
Maqedonia U-21 nesër (1 tetor) në orën 18:00, në stadiumin “Petar Miloshevski” në Manastir, do të përballet me Malin e Zi, ndërsa më 6 tetor do të luajë si mysafire kundër Suedisë.
