Македонската фудбалска репрезентација претрпе нов пораз во Лигата на нации, откако загуби од селекцијата на Шкотска со 0-2 на домашен терен. Гостите покажаа поголема решителност во завршницата, додека нашата репрезентација и по три одиграни кола останува без постигнат погодок.
Раната предност за Шкотска ја донесе Киран Боуви во шестата минута со прецизен удар од 25 метри.
Македонија тешко креираше шанси, а најсериозниот обид во првото полувреме го имаше Бојан Илиевски. Тој шутираше во 22.минута, но не беше прецизен.
По полувремето, Шкотите ја контролираа играта, а победата ја потврдија преку Џон МекГин од пенал во 70. минута, досуден поради игра со рака на Миовски. По интервенција на ВАР, судијата Летесие покажа на белата точка.
Претходно, имаше момент кога тој досуди пенал по стартот на Гаштаров, но по асистенција на ВАР ја повлече одлуката.
Иако гостите ги одиграа последните десет минути со фудбалер помалку по исклучувањето на Скот МекКена, македонскиот тим не успеа да постигне погодок и Шкотска ја однесе победата.
