Lojtarët e Shkupit vazhdojnë me përgatitjet dhe stërvitjen, megjithëse shumë gjëra janë ende të paqarta rreth funksionimit të ekipit nga Çairi. Shkupi nuk e luajti ndeshjen me Sileksin në kuadër të raundit të dytë të Ligës së Parë të Futbollit, sepse nuk ofroi kushtet e nevojshme për zhvillimin e një ndeshjeje kampionale, kryesisht të lidhura me përdorimin e sistemit VAR. Megjithatë, sipas Erion Shukut, kjo nuk i pengoi stafin teknik dhe lojtarët të vazhdonin me përgatitje intensive për ndeshjen e radhës.
"Atmosfera në ekip është shumë pozitive dhe lojtarët janë të motivuar për të dhënë më të mirën në fushë, duke e ditur rëndësinë e ndeshjes. Ne punuam shumë. Edhe pse ndeshja me Sileksin nuk u luajt për arsye të tjera, ne e shfrytëzuam kohën për t'u stërvitur më shumë, për të rritur intensitetin dhe për të përmirësuar disa detaje taktike. Në këtë drejtim, mendoj se patëm kohë shtesë për t'u përgatitur më mirë", tha Erion Shuku.
Ai beson se Pelisteri është favorit, por se në futboll ka gjithmonë vend për surpriza. Shuku thekson se ai dhe shokët e tij të ekipit do të luajnë për të fituar çdo ndeshje.
"Pelisteri është favorit në letër, por futbolli gjithmonë sjell surpriza. Ne luajmë në një fushë neutrale dhe besojmë në potencialin tonë. Gjithçka do të vendoset në fushën e gjelbër. Çdo pikë është e vlefshme, por për një klub si Shkupi, me traditë dhe tifozët më të zjarrtë në vend, një pikë nuk mund të konsiderohet sukses. Qëllimi ynë është të tregojmë se jemi një klub i madh dhe të dalim në fushë për të fituar tre pikët", shtoi Shuku.
Ndeshja Pelister – Shkupi do të luhet sot (25 gusht) në stadiumin e Kavadarit, duke filluar nga ora 17:00.
