Ekipi i FC Shkupit nuk arriti të sigurojë kushtet e nevojshme në kohë për të zhvilluar ndeshjen e kampionatit dhe derbin me Vardarin në stadiumin në Çair, kështu që u detyrua të regjistronte një stadium alternativ për raundin e 4-të. Ndeshja do të luhet në stadiumin "Mladost" në Strumicë. Kapiteni i ekipit nga Çairi, Suhel Muharemi, beson se pas krizës në raundet e para, gjërat do të lëvizin në një kahje pozitive.
"Humbjet erdhën si rezultat i problemeve të caktuara që tani po kalohen. Në javët e fundit, ne jemi përgatitur në maksimum. Ndeshja kundër Pelisterit ishte një provë e madhe për ne, por pavarësisht kërkimit tonë të vazhdueshëm për fitore, fati nuk ishte në anën tonë. Po i lëmë të gjitha këto pas, sepse ndeshja kundër Vardarit është përpara nesh. Po punojmë vetëm për një rezultat pozitiv, çdo gjë tjetër do të ishte një zhgënjim për ne", theksoi Muharemi.
Kapiteni i Shkupit, së bashku me stafin e trajnerëve, bënë një analizë të detajuar të kundërshtarit.
"Ndeshjet kundër Vardarit kanë gjithmonë një peshë të veçantë për ne. E analizuam kundërshtarin nga të gjitha aspektet dhe nuk do të veçoja ndonjë lojtar specifik si rrezikun më të madh. Siç thashë edhe më parë, ne jemi të interesuar vetëm të fitojmë. Nuk ka rëndësi se kush është përpara nesh, sepse ne po luajmë me kusht në shtëpi."
Muharremi i bëri thirrje grupit të tifozëve "Shvercerët" që të jenë me ekipin në ndeshjen vendimtare.
"Derbi nuk do të ishte derbi pa 'Shvercerët'. Grupi ynë i tifozëve është lojtari i 12-të, forca dhe motivimi ynë më i madh. Pa ta, jo vetëm derbi, por as Shkupi nuk do të ishte ai që është sot. Kjo është arsyeja pse u bëj thirrje të gjithëve të bashkohen të premten dhe të mbështesin ekipin, sepse kemi nevojë për ta më shumë se kurrë. Shkurt, kjo ndeshje është e rëndësishme për mua, ashtu siç është e rëndësishme për çdo tifoz të ekipit nga Çairi."
Ndeshja Shkupi - Vardar do të luhet në stadiumin "Mladost" në Strumicë, me fillim në orën 16:30.
