Raundi i dytë i kampionatit të ri të Ligës së Parë, do të fillojë me duelin në Kavadar, midis ekipeve të Tikveshit dhe Vardarit. Ndeshja është planifikuar për në orën 17:00, dhe vendasit mezi presin vizitën e fituesit aktual të Kupës së Maqedonisë dhe përfaqësueses së këtij viti në Evropë.
Tikveshi gjithashtu ishte nikoqir në raundin e parë, kundër Rabotniçkit, në një ndeshje që përfundoi pa gola. Një nga përgjegjësit për pikën e fituar ishte portieri Hristijan Stevkovski, i cili u zgjodh në ekipin ideal të raundit të parë.
"Vardari është një nga ekipet më cilësore në kampionatin vendas për momentin dhe këtë e tregon seria e gjatë e ndeshjeve pa humbje. Fitorja e Kupës, paraqitja në Evropë, e gjithë kjo nuk është rastësi. Vardari luan shumë i disiplinuar dhe ky është një motiv shtesë për ne që të zhvillojmë një ndeshje të mirë. Vetëm nëse jemi në nivelin më të lartë do të arrijmë rezultatin e dëshiruar."
"Vardari meriton respekt të madh dhe është një nga kandidatët kryesorë për titullin e kampionit këtë sezon. Megjithatë, Tikveshi është një ekip që askush nuk duhet ta nënvlerësojë, sepse kemi cilësi në çdo pozicion. Atmosfera në ekip është e shkëlqyer dhe pres një ndeshje cilësore. Sigurisht, shpresoj në një mbështetje të madhe nga i gjithë Kavadari, në mënyrë që të arrijmë rezultatin e dëshiruar", tha Stevkovski.
