Pas performancës pozitive në Gjevgjeli dhe fitores ndaj Kozhufit në Kupën e Maqedonisë, skuadra e Shkupit shpreson në një rezultat pozitiv, këtë herë kundër Brerës në Strumicë.
Xhihan Adili, lojtari që shënoi në ndeshjen e mëparshme, beson se ndeshja kundër Brerës është një nga më të rëndësishmet për pjesën tjetër të sezonit dhe thekson se për të rezultati i ekipit është gjithmonë më i rëndësishëm sesa statistikat personale.
"Jam i lumtur që shënova një gol në ndeshjen e Kupës, por për mua gjëja më e rëndësishme është performanca e ekipit. Prioriteti im është gjithmonë të jap maksimumin. E kemi analizuar kundërshtarin, e njohim Brerën nga ndeshja miqësore që luajtëm para fillimit të sezonit, por kjo është një sfidë krejtësisht e ndryshme, më serioze dhe më konkurruese. Presim një ndeshje të vështirë dhe e dimë se duhet të japim maksimumin për të arritur një rezultat pozitiv", tha Adili.
Ndeshja Brera - Shkupi do të luhet në stadiumin "Mladost" në Strumicë, me fillim në orën 15:30.
