Përfaqësuesja A e Maqedonisë zhvilloi grumbullimin e parë dhe dje kreu stërvitjen e parë në prag të ciklit të ri të Ligës së Kombeve. Përzgjedhjen tonë në Ligën B e presin katër ndeshje kundër Zvicrës, Sllovenisë dhe Skocisë.
Në grumbullimin e përfaqësueses iu bashkuan gjithashtu Stole Dimitrievski, Ezgjan Alioski, Elmin Rastoder dhe Hristijan Maleski. Darko Çurlinov, për shkak të problemeve administrative lidhur me qëndrimin e tij në Poloni, nuk do të jetë në gjendje të luajë në ndeshjet e ardhshme.
Sfida e parë për të përzgjedhurit e Goce Sedlloskit është dueli me Zvicrën më 26 shtator në Shkup, pas të cilit pasojnë ndeshja në transfertë ndaj Sllovenisë më 29 shtator, ndeshja në transfertë ndaj Zvicrës më 6 tetor në Lucern dhe ndeshja kundër Skocisë më 3 tetor në Shkup.
Në prag të ndeshjes së parë, Agon Elezi, i cili po paraqitet në formë të shkëlqyer me fanellën e Sarajevës, thekson se fokusi i përfaqësueses në këtë moment është tërësisht i përqendruar te Zvicra.
„Para së gjithash, është një kënaqësi dhe privilegj i jashtëzakonshëm të jesh sërish pjesë e kësaj përfaqësueseje, e këtij grupi fantastik. Është e vërtetë se na presin katër ndeshje shumë të vështira, por për momentin për ne ekziston vetëm njëra, ajo e së shtunës kundër Zvicrës. Të gjithë i dimë cilësitë e tyre dhe ne duhet të përqendrohemi vetëm te vetja, të mos bëjmë gabime, sepse çdo gabim yni mund të na kushtojë shumë.“.
Zvicra tregoi në Botëror se është në formë të shkëlqyer dhe se ka cilësi të mëdha te çdo individ. Por, ne duhet të përqendrohemi te vetja dhe të kemi besim se mund të arrijmë një rezultat pozitiv. Kështu do të hyjmë edhe në ndeshje. Gjëja më e rëndësishme në ndeshjet e mëparshme ishte të njiheshim me stafin e ri teknik, me lojtarët e rinj dhe me idetë e reja. Mendoj se na sollën shumë dhe se mësuam shumë.
Gjëja më e rëndësishme ishte të krijonim një atmosferë të mirë mes nesh, mes lojtarëve, dhe kjo u dëshmua. Të gjithë jemi në një atmosferë të mirë, kemi kohezion të mirë dhe tani duhet vetëm ta transferojmë këtë në fushë, duke filluar nga e shtuna.“
Ndeshja Maqedonia – Zvicra do të zhvillohet më 26 shtator, duke filluar në orën 20:45, në Arenën Kombëtare „Todor Proeski“ në Shkup.
