Skuadra e Bashkimit lë pas humbjen e rëndë nga Struga Trim Lum (0:5) dhe me një fitore bindëse 4:0 kundër Pobedës si mysafire, në kuadër të 1/16 finaleve të Kupës së Maqedonisë, ngriti optimizmin para ndeshjeve në Ligën e Parë.
Ekipi nga Kumanova do të vizitojë Shkendijën në Tetovë gjatë ditës së premte dhe kjo ndeshje do të ketë një rëndësi të veçantë për kapitenin Armend Alimi, i cili e filloi karrierën e tij te Bashkimi, dhe më pas ishte pjesë e ekipit kuqezi të Tetovës për një periudhë të gjatë.
Alimi vuri në dukje se kthimi në Tetovë gjithmonë sjell emocione të veçanta për të, sepse luan kundër një klubi ku kaloi pothuajse gjysmën e karrierës së tij dhe i cili, siç thotë ai, do të ketë gjithmonë një vend të veçantë në zemrën e tij.
Kapiteni theksoi se skuadra pati kohë të mjaftueshme për t’u rikuperuar dhe për të analizuar gabimet nga humbja ndaj Strugës, duke shtuar se atmosfera në skuadër është pozitive dhe se pret një performancë cilësore në derbi.
"Ne hyjmë në çdo ndeshje me qëllimin për të fituar tre pikë, dhe e njëjta gjë do të ndodhë edhe në Tetovë. Megjithatë, jemi të vetëdijshëm se po luajmë kundër një kundërshtari të fortë dhe se edhe një barazim do të ishte i pranueshëm për ne", tha Alimi.
Ai theksoi se Shkendija është një ekip me cilësi dhe kapacitet të madh, pa dobësi të theksuara, por se fokusi i Bashkimit është te loja e tyre dhe mënyra se si do t'i qasen ndeshjes.
Ndeshja e xhiros së 5-të në Ligën e Parë, midis Shkendijës dhe Bashkimit, do të luhet të premten, në stadiumin e Tetovës, duke filluar nga ora 15:30.
