Në ndeshjen e parë të gjysmëfinales së Kupës së Maqedonisë, Shkëndija e Tetovës arriti një fitore 3:2 ndaj Shkëndijës së Haraçinës. Edhe pse skuadra vendase festoi, pasiguria mbetet për ndeshjen e kthimit pas një sërë kthesash në ndeshjen e sotme.
Ndeshja nisi mirë për ekipin nga Tetova. Që në aksionin e parë, u akordua një penallti për ekipin vendas, pasi mbrojtja mysafire nuk ndërhyri në kohë dhe Vane Krstevski u rrëzua. Trumçi ishte një golashënues i sigurt nga 11-metra, gjë që i solli avantazhin 1:0.
Mysafirët kërcënuan në minutën e 10-të me një goditje dënimi, por portieri Amzai ishte në lartësinë e detyrës. Pas disa përpjekjeve nga Islami dhe Krstevski për vendasit, Shkëndija nga Haraçina arriti të barazonte shifrat në 1-1 në minutën e 30-të. Sharkoski krosoi, dhe Nuhia shënoi gol me goditje të saktë me kokë. Para përfundimit të pjesës së parë (43’), mysafirët bënë një kthesë të plotë me anë të Livarekës, i cili shënoi pas një depërtimi të shkëlqyer për epërsi 1:2.
Vendasit hynë me vendosmëri në pjesën e dytë dhe në aksionin e parë serioz me anë të Vane Krstevskit barazuan rezultatin në 2:2. Presioni vazhdoi dhe në minutën e 64-të Krasniqi humbi një rast ideal për epërsi.
Megjithatë, në minutën e 68-të, pas një harkimi të Krasniqit nga një goditje dënimi, Anes Meliqi shënoi nga afërsia për 3:2.
15 minutat e fundit sollën shumë emocione. Në minutën e 75-të, Adili pothuajse barazoi rezultatin me një solo vrapim të shkëlqyer dhe një gjuajtje të fuqishme.
Në minutën e 89-të, Sharkoski kërcënoi nga krahu i djathtë, por Amzai ishte përsëri i sigurt.
Në kohën shtesë të gjyqtarit, Rushiti gjuajti fuqishëm nga distanca, por portieri Amzai, me një tjetër ndërhyrje të suksesshme, ia ruajti fitoren ekipit të Tetovës.
Ndeshja e kthimit (6 maj) do të përcaktojë fituesin për finalen e madhe, ku Shkëndija nga Tetova do të hyjë me një gol avantazh.
