Shkëndija ishte anemike në 45 minutat e para, kur në fushë dolën lojtarët me më pak kohë loje këtë sezon. Mysafirët e shfrytëzuan këtë dhe kishin kontrollin e plotë të lojës.
Ata ishin të parët që kërcënuan, nëpërmjet Sikiru, i cili u përpoq ta surprizonte portierin e Shkendisë me një përpjekje të mrekullueshme, por Guaye ndërhyri me sukses. Në mes të pjesës së parë, Xhezair Avdili dërgoi një raketë të vërtetë nga 30 metra, por topi shkoi jashtë portës së ekipit vendas.
Shkendija kërcënoi për herë të parë në minutën e 36-të me anë të Florent Ramadanit, por gjuajtja e tij përfundoi në duart e portierit mysafir. Pesë minuta para përfundimit të pjesës së parë, edhe Ignjatov kërcënoi me një gjuajtje nga 16 metra, por përsëri portieri i kuqezinjve ishte në vendin e duhur.
Në minutën e 76-të, Arbin Zejnulai u gjend ballë për ballë me portierin Islami, por topi përfundoi në shtyllë. Vetëm pak çaste më vonë, në anën e kundërt, në një kundërsulm, Perović gjuajti fort, por Guaye e dërgoi topin në goditje nga këndi. Dy minuta më vonë, Perović hyri në zonën e penalltisë dhe goditi traversën.
Në pesë minutat e fundit, Latifi pati një tjetër shans të shkëlqyer, duke hyrë në zonën e penalltisë dhe duke kaluar portierin mysafir, por nuk arriti të gjuante, duke humbur ekuilibrin. Në kohën shtesë, Ibraimi gjuajti fort, por portieri Islami reagoi edhe më mirë.
Në raundin tjetër, Shkendija do të vizitojë Rabotniçkin, ndërsa Arsimi do të presë Sileksin në Gostivar.
