Arsimi do ta fillojë sezonin e ri në Ligën e Parë të Futbollit të Maqedonisë me një vizitë në Kavadar. Pas debutimi të suksesshëm në klubin elitar, skuadra hyn në sezonin e saj të dytë midis më të mirëve me një objektiv të qartë, një vend në pjesën e sipërme të tabelës.
Para ndeshjes së parë, trajneri i Arsimit, Vildan Saliu, shprehu kënaqësinë për punën e bërë në periudhën përgatitore.
"Pas disa javësh përgatitjesh intensive, mund të them se jemi të kënaqur me mënyrën se si shkoi faza parasezonale. Lojtarët punuan me përkushtim maksimal në çdo seancë stërvitore, duke treguar disiplinë, profesionalizëm dhe dëshirë për të përparuar çdo ditë", tha Saliu.
Gjatë përgatitjeve, Arsimi luajti edhe disa ndeshje miqësore, të cilat i shërbyen stafit të trajnerëve për të testuar idetë taktike dhe për të përmirësuar lojën e ekipit.
"Rezultatet e këtyre ndeshjeve ishin të rëndësishme, por edhe më e rëndësishme ishte progresi që tregoi skuadra ditë pas dite. Sigurisht, ka ende segmente në të cilat mund të përmirësohemi, por kjo është normale në fillim të sezonit", shtoi kreu i stafit trajner të ekipit nga Gostivari.
Saliu theksoi se e gjithë skuadra është plotësisht e fokusuar në ndeshjen hapëse kundër Tikveshit.
"Fokusi ynë tani është plotësisht te ndeshja hapëse e sezonit kundër Tikveshit në Kavadar. Kemi respektin maksimal për kundërshtarin tonë dhe e dimë se na pret një ndeshje e vështirë, por kemi besim në punën që kemi bërë gjatë kësaj periudhe. Besoj se ekipi është i përgatitur fizikisht, taktikisht dhe psikologjikisht për ta filluar sezonin në mënyrën më të mirë të mundshme, " tha mes tjerash Saliu
Në fund, Saliu tha se Arsimi do të bëjë çmos që ta përfaqësojë klubin dhe tifozët me dinjitet.
"Do të japim maksimumin në fushë për të përfaqësuar klubin, qytetin dhe tifozët tanë me dinjitet. Shpresojmë që me përkushtim, karakter dhe shpirt garues të arrijmë një rezultat pozitiv në Kavadarci dhe ta fillojmë sezonin me një hap fitues. Arsimi dëshiron të vazhdojë zhvillimin e saj në sezonin e ri dhe të etablohet si një nga kandidatët seriozë për një vend në pjesën e sipërme të tabelës së LPFM-së."
Ndeshja luhet në stadiumin e qytetit në Kavadar, ndërsa fillimi është caktuar për në ora 17:00.
