Ekipi i Arsimit udhëton drejt kryeqytetit me dëshirën për të regjistruar fitoren e dytë në kampionat. Kundërshtari është Shkendija nga Araçina, e cila në raundin e kaluar festoi në transfertë në Kavadar, duke mposhtur Tikveshin me 1:0.
Fitorja e javës së kaluar kundër Bashkimit solli motivim dhe vetëbesim shtesë në radhët e Arsimit. Atmosfera në ekip është e shkëlqyer, dhe të gjithë lojtarët janë të përqendruar maksimalisht për të vazhduar me rezultate pozitive.
Përpara ndeshjes, futbollisti Subi Mustafa tha:
"Jemi të përgatitur për këtë ndeshje dhe e presim me respekt maksimal për kundërshtarin. Atmosfera në ekip është shumë e mirë, të gjithë jemi të motivuar dhe të përqendruar për të dhënë më të mirën në fushë. Fitorja e fundit na solli besim shtesë dhe tani synojmë të vazhdojmë me rezultate pozitive. Shpresojmë të luajmë një ndeshje të bukur, të denjë për të dy klubet."
Ky duel premton shpirt luftarak dhe sportivitet, pasi të dy klubet kanë ambicie të qarta për sukses. Për Arsimin, kjo është një mundësi për të forcuar rrugën drejt fitoreve të reja dhe për të treguar karakterin e ekipit në një ndeshje që shihet si një festë sportive, por edhe një sfidë e vërtetë në fushë.
Ndeshja Shkendija Araçinovo-Arsimi do të luhet në stadiumin e Çairit duke filluar nga ora 16:30.
