Struga Trim Lum doli fituese në derbin ndaj Vardarit në xhiron e tretë të Ligës së Parë të Futbollit të Maqedonisë, pasi fitoi me rezultat 1-0 në shtëpi. Hristijan Maleski shënoi golin e vetëm të ndeshjes, ndërsa Vardari humbi një shans të madh për të shmangur humbjen në fund të takimit. David Babunski në minutën e 96-të nuk arriti të shënojë penallti për kampionin.
Për kampionin aktual, kjo është humbja e dytë radhazi në tre raundet e para, ndërsa Struga Trim Lum vazhdon me një nisje të shkëlqyer të sezonit.
Mundësia e parë serioze erdhi në minutën e 11-të, kur pati një rrëmujë para portës së ekipit vendas, por Pape Fal ndërhyri në kohë dhe largoi topin para vijës së portës.
Katër minuta më vonë, Filip Najdovski tentoi një gjuajtje nga distanca, por topi përfundoi jashtë portës.
Struga TL mund të kishte kaluar në epërsi në minutën e 41-të. Pas një pasimi të shkëlqyer nga Bunjamin Shabani, Marjan Radeski u gjend në një pozicion të mirë dhe gjuajti nga rreth 15 metra, por Davor Taleski bëri një pritje të shkëlqyer.
Vardari u kundërpërgjigj dy minuta më vonë me anë të Darko Velkovskit, i cili me kokë e gjuajti një goditje këndi nga e djathta, por direkt në Andrej Jovçevskin.
Mundësia e fundit në pjesën e parë ishte e Diego Kastaneda, i cili gjuajti nga rreth 18 metra, por topi përfundoi mbi portën e Strugës.
Vendasit kaluan në epërsi në minutën e 61-të. Shabani luajti mirë me Maleskin, i cili gjuajti fuqishëm nga e djathta dhe e mposhti Taleskin për 1-0.
Vetëm dy minuta më vonë, Maleski mundi të shënonte edhe golin e dytë, por këtë herë portieri i Vardarit ishte më i suksesshëm dhe pengoi rritjen e avantazhit.
Vardari tentoi barazimin në pjesën e dytë. Në minutën e 75-të, Mislav Matić kërcënoi me kokë, por Jovcevski ishte i sigurt dhe e mbajti portën.
Mysafirët patën një mundësi ideale për të barazuar rezultatin në minutën e 96-të. Pas një harkimi nga Mihail Manevski, Diako luajti me dorë në zonën e penalltisë, dhe gjyqtari tregoi nga pika e penalltisë.
David Babunski mori përgjegjësinë, por gjuajtja e tij përfundoi lart mbi portë. Vardari humbi shansin e fundit për një pikë, dhe Struga Trim Lum arriti deri te 3 pikët në derbi.
