Ekipi i Bashkimit, pas humbjes nga Struga Trim Lum dhe pezullimit në stadiumin e Kumanovës, tani përballet me një luftë të vështirë për t'u larguar nga zona e play-off-it. Megjithatë, orari nuk është në favor të ekipit nga Kumanova, pasi do të përballet me ekipet që luftojnë për titullin e kampionatit - Shkëndija dhe Vardari.
Sipas Muharem Mislimit, ndeshja e sotme në Tetovë kundër Shkendijës është një “luftë e vërtetë gladiatorësh” që kanë qëllime diametralisht të kundërta.
"Ndeshja në Tetovë do të jetë më e vështira për ne këtë sezon, sepse po luajmë kundër një skuadre për të cilën fitorja është e domosdoshme. Me mungesën e të dy mbrojtësve qendrorë dhe kapitenit Armend Alimi për shkak të kartonave të verdhë, kjo ndeshje është një mision për ne i cili, nëse e përfundojmë me sukses, do të shkruhet me shkronja të arta në analet e klubit. Pres një luftë gladiatorësh - njëra palë lufton për titullin, dhe tjetra për shpëtimin nga play-off-et", tha ndër të tjera Mislimi.
Në 15 ndeshjet e mëparshme midis këtyre dy ekipeve, Shkëndija ka qenë më e suksesshme me gjithsej 8 fitore. Ekipi i Bashkimit ka fituar tre herë, ndërsa 4 ndeshje kanë përfunduar barazim. Këtë sezon, "kuqezinjtë" nga Tetova kanë dominuar në dy duelet e mëparshme (një fitore 5-1 në Tetovë dhe një fitore 3-1 në Kumanovë) dhe hyjnë në ndeshjen e sotme si favoritë absolutë.
Ndeshja Shkëndija-Bashkimi do të luhet në stadiumin e qytetit në Tetovë, me fillim në orën 16:00.
