Shkëndija është rikthyer sërish në rrugën e fitoreve pas dy barazimeve, duke mposhtur Bashkimin në Gostivar me rezultat 4-1 në ndeshjen e xhiros së 8-të. Kuqezinjtë e nisën ndeshjen me ritëm të lartë dhe kaluan herët në epërsi, në minutën e 15-të, përmes Ndzen gues, pas asistimit të Tambës. Bashkimi arriti të barazojë në minutën e 40-të, kur Ribeiro e dërgoi topin në zonë nga gjuajtja e lirë, ndërsa Fatih Ismaili u gjend më së miri dhe shënoi për 1-1.
Menjëherë në fillim të pjesës së dytë, në minutën e 46-të, Trumçi depërtoi nga krahu i djathtë dhe pasoi te Krasniqi, gjuajtja e të cilit u prit nga portieri, por Krieziu e ndoqi aksionin dhe i riktheu epërsinë Shkëndijës për 2-1. Në minutën e 51-të, Jonuzi goditi shtyllën dhe ishte pranë barazimit, por fati nuk ishte në anën e Bashkimit.
Në minutën e 71-të, Tamba u gjend sërish i vetëm në zonë dhe realizoi për 3-1, ndërsa goditjen përfundimtare e dha Trumçi në minutën e 87-të, kur pas një aksioni nga krahu i majtë portieri e largoi topin para Tambës, por Trumçi ishte në vendin e duhur dhe e dërgoi në rrjetë për 4-1.
Një paraqitje efikase dhe dominuese e skuadrës së Tetovës, e cila konfirmoi forcën e saj në sulm, ndërsa Bashkimi tregoi se është një ekip në ngritje dhe mund të jetë një sfidë serioze për çdo kundërshtar.
