Në kuadër të xhiros së 6-të të PMFL-së, ekipi i Struga Trim Lum shënoi një fitore minimale, por jashtëzakonisht të rëndësishme 1–0 ndaj Sileksit në shtëpi, në një ndeshje ku mysafirët nga Kratova kërcënuan të parët përmes Manojlovit, goditjen e të cilit e mbrojti Vasilevi.
Menjëherë pas kësaj, Donov humbi një mundësi të madhe, ndërsa më pas Shero, nga ana e djathtë, goditi vetëm rrjetën e jashtme, pas së cilës vendasit patën përgjigjen më serioze në minutën e 28-të, kur Radeski lëshoi një goditje të fuqishme në zonën e rreptësisë, por portieri Xhekov, me përpjekje të fundit, arriti ta devijonte topin në shtyllë.
Më pas, Manojlov ishte sërish i pasaktë në përfundimin e aksionit në pjesën e parë.
Në pjesën e dytë, pas një goditje nga këndi, Radeski goditi me kokë, ndërsa Lasana Diako e shfrytëzoi me mjeshtëri topin e devijuar nga mbrojtja kundërshtare dhe e nguli në rrjetë për 1–0.
Sileksi kërcënoi në minutën e 73-të, kur Paunovski gjuajti mbi traversë nga goditja e lirë, duke bërë që rezultati të mbetej i pandryshuar deri në fund, për gëzimin e madh të struganëve.
Në xhiron e 7-të, Struga TL do të jetë mysafire e Tikveshit, ndërsa Sileksi do ta presë Bregallnicën në Kratovë.
