Trajneri i përfaqësueses së Maqedonisë, Goce Sedloski, iu drejtua mediave pas humbjes bindëse ndaj Danimarkës në Kopenhage, në gjysmëfinalen e ndeshjeve eliminatore të Kupës së Botës 2026.
Ai theksoi se pika kthese e ndeshjes ishte goli i hershëm i kundërshtarit në fillim të pjesës së dytë, pas të cilit skuadra humbi plotësisht ekuilibrin.
"Ne luajtëm pjesën e parë të disiplinuar dhe isha i kënaqur me atë se si ishim në fushë. Në pushimin pas pjesës së parë, theksova se duhet të ishim të kujdesshëm në minutat e para, por atëherë pësuam një gol. Kjo na nxori nga ritmi dhe më pas e patëm të vështirë të riktheheshim në lojë", tha Sedloski.
Trajneri theksoi se kundërshtari i ndëshkoi dobësitë për të cilat kishte paralajmëruar më parë.
"Kjo është një goditje e fortë për ne. Danimarka shënonte gola nga krahët, diçka që ne e analizuam dhe u përpoqëm ta mbyllnim. Mbrojtësit e tyre të krahut krijonin vazhdimisht avantazh numerik dhe na shkaktonin probleme të mëdha në mbrojtje", shtoi Sedloski.
